OS GOZOS E AS SOMBRAS

Seguindo nesta homenaxe a un tempo e un espazo (o Bueu dos anos 20 e 30), remítome a unha obra senlleira da literatura española: Los gozos y las sombras .
Coido que esta novela de Torrente Ballester non foi suficientemente estudada en relación ó retrato dunha vila e duns personaxes reais. Nela está o dono indiscutible do Bueu daquela época, un Gaspar Masso que era á vez home do seu tempo (creador do museo actual, mecenas de artistas, seguidor da tecnoloxía e as artes do marketing) e señor feudal. Nela está Juanito dos Santos, o tolo máis cordo da vila e compañeiro inseparable de homes da cultura como Castroviejo. Nela está maltratado e mal retratado (traizón inexplicable de Torrente Ballester) Johan Carballeira, que só se albisca na súa loita polos mariñeiros (conseguiu un prezo fixo para a sardiña sendo alcalde) e na súa pertenza a unha rama da fidalguía vida a menos da vila; aínda que quizais a súa persoa se desdobre en dúas e tamén forme parte dese médico culto e reflexivo que tan ben interpretou Eusebio Poncela na non tan boa adaptación televisiva. E nela están alcumes (a Rucha, etc.) e lugares comúns do Bueu da época.
Nela, en fin, aínda pervive un Bueu que o mal gusto e o interese político e económico están facendo desaparecer (remodelación nefasta do pazo da familia de Johan Carballeira, terribles casetas para os mariñeiros no peirao, perda da praia de Pescadoira no centro da vila por mor da ampliación do peirao, deterioro do emblemático lugar da Praia de Beluso e perda parcial da praia por mor dun peirao "deportivo", derrube da fábrica de Massó, perda de varias vivendas emblemáticas do centro da vila, remodelación de rúas que máis ben parece que levan 20 anos feitas polo seu estado...).
En fin... sempre nos quedará a literatura.